„Ou-tjiepe-lou, ek sê vir jou, ek is Henriette die hoendervrou,

ê-tjiepe-lê, ek wil vir jou sê, ek kan lekker lewendige storie-eiers lê!“

Henriette Hoendervrou kán goue eiers lê as sy wil, maar veiligheidsonthalwe verkies sy om fantastiese storie-eiers te lê. Buitendien dink sy dit is soveel meer opwindend, want storie-eiers is mos lewendig.

Dis alweer sulke tyd en vinnig-vinnig bou Henriette Hoendervrou (geskep en gespeel deur die poppespeelster en aktrise Wiebke Holm-Mikula) haar nes. Dáár sit sy dan ewe gemaklik op haar eiers en broei – o, wat ´n heerlike geleên-tyd om te kekkel! Henriette se bekkie staan maar min stil en die tyd vlieg soos sy vertel tot – krrrk – die eerste eiertjie oopkraak en ´n onbeholpe allerliefste storie-kuikentjie sy kop uitsteek.

Nou is daar geen keer nie, Henriette Hoendervrou vat jou saam met die kuikenstories soos wat hulle uitbroei:

kom sien hoe Fiemie Verestowwer grootword,

kom wonder saam waar die malkop-eier heengaan,

kom bespiegel ook wat van Wol, die wêreld-laaaaaaaaangste-wurm kan word en

kom beleef hoedat al die storie-eiers hul voete in die wêreld vind.

Gun jouself en jou liefstes die genot om Henriette Hoendervrou te ontmoet.